പത്തനംതിട്ട: കണ്ണൂര് എഡിഎം നവീന് ബാബുവിന്റെ മരണത്തില് സിബിഐ അന്വേഷണം ആവശ്യപ്പെട്ടുള്ള ഹര്ജി തള്ളിയതില് അപ്പീല് നല്കുമെന്ന് കുടുംബം അറിയിച്ചു. ഹൈക്കോടതി വിധി അന്തിമമല്ല. കേസില് നിന്നും പിന്മാറാന് ഉദ്ദേശിക്കുന്നില്ല. ഏതറ്റം വരെയും മുന്നോട്ട് പോകുമെന്നും കുടുംബം മാധ്യമങ്ങളോട് പ്രതികരിച്ചു.കണ്ണൂര് ഡിഐജിയുടെ മേല്നോട്ടത്തില് അന്വേഷിക്കണമെന്ന നിര്ദേശത്തോടെയാണ് ഹൈക്കോടതി സിബിഐ അന്വേഷണം തള്ളിയത്.
അന്വേഷണ പുരോഗതി കുടുംബത്തെ അറിയിക്കണമെന്നും ഹൈക്കോടതി അറിയിച്ചിട്ടുണ്ട്.
ജസിസ് കൗസര് എടപ്പഗത്തിന്റെ ബെഞ്ചാണ് ഹര്ജി തള്ളിയത്. കേസ് കണ്ണൂര് ഡിഐജിയുടെ മേല്നോട്ടത്തില് അന്വേഷിക്കണമെന്നും എസ്ഐടി സുതാര്യമായ അന്വേഷണം നടത്തണമെന്നും ഹൈക്കോടതി നിർദ്ദേശിച്ചിട്ടുണ്ട്. ഡിഐജിയുടെ അനുമതിയോടെ മാത്രമേ കുറ്റപത്രം നല്കാവൂ എന്നും ഹൈക്കോടതി ഉത്തരവിൽ വ്യക്തമാക്കിയിട്ടുണ്ട്.
കേസില് പ്രത്യേക അന്വേഷണ സംഘത്തിന്റെ അന്വേഷണം തുടരും.നവീൻ ബാബുവിന്റേത് കൊലപാതകമാണെന്നും കെട്ടിത്തൂക്കി കൊലപ്പെടുത്തിയതാണെന്നുമായിരുന്നു കുടുംബത്തിന്റെ വാദം. കേസ് സംസ്ഥാന പൊലീസ് അന്വേഷിച്ചാൽ രാഷ്ട്രീയ പക്ഷപാതപരമായ അന്വേഷണം മാത്രമാണ് നടക്കുക. ഈ സാഹചര്യത്തിൽ കേസ് സ്വതന്ത്ര ഏജൻസി അന്വേഷിക്കണം എന്നാണ് കുടുംബത്തിന്റെ ആവശ്യം.
നവീന് ബാബുവിനെ കെട്ടിത്തൂക്കി കൊന്നതാണോ എന്ന സാധ്യത പരിശോധിച്ചില്ല. യാത്രയയപ്പ് ചടങ്ങിന് ശേഷം ചിലര് നവീന് ബാബുവിനെ കണ്ടു. മരണത്തിലേക്ക് നയിച്ച വസ്തുതകള് പുറത്തുകൊണ്ടുവരാനായില്ലെന്നും കുടുംബം ഹർജിയിൽ ചൂണ്ടിക്കാണിച്ചിരുന്നു.