ചെന്നൈ: ഇന്ത്യന്‍ പ്രീമിയര്‍ ലീഗില്‍ ഇന്ന് ചെന്നൈ സൂപ്പര്‍ കിംഗ്‌സിനെതിരായ മത്സരത്തില്‍ റോയല്‍ ചലഞ്ചേഴ്‌സ് ബെംഗളൂരുവിന് വേണ്ടി ഭുവനേശ്വര്‍ കുമാര്‍ കളിച്ചേക്കും. താരത്തിന് നിലവില്‍ പരിക്കുകളൊന്നും ഇല്ലെന്നും നെറ്റ്‌സില്‍ നന്നായി പന്തെറിഞ്ഞുവെന്നും ആര്‍സിബി മെന്റര്‍ ദിനേശ് കാര്‍ത്തിക് വ്യക്തമാക്കി.
ഭുവനേശ്വറിന് ഇപ്പോള്‍ ഫിറ്റ്‌നെസ് പ്രശ്‌നങ്ങള്‍ ഒന്നും തന്നെ അലട്ടുന്നില്ലെന്നും പരിശീലനത്തില്‍ നന്നായി പന്തെറിഞ്ഞുവെന്നും കാര്‍ത്തിക് പറഞ്ഞു.
ചെന്നൈ സൂപ്പര്‍ കിംഗ്‌സിനെതിരെ താരം കളിക്കുമെന്നും കാര്‍ത്തിക് സ്ഥിരീകരിച്ചു.ഇന്ന് ചെന്നൈ ചെപ്പോക്കില്‍ വൈകിട്ട് ഏഴ് മണിക്ക് മത്സരത്തിന് ടോസ് വീഴും. നേര്‍ക്കുനേര്‍ വരുമ്പോള്‍ എം എസ് ധോണിയും വിരാട് കോലിയും തമ്മിലുള്ള പോരാട്ടം കൂടിയാണിത്. ഉറ്റ സുഹൃത്തുക്കള്‍ കൂടിയാണ് ഇരുവരും. ആദ്യ മത്സരം ജയിച്ചാണ് ഇരുവരും വരുന്നത്.
നേര്‍ക്കുനേര്‍ ബലത്തില്‍ ചെന്നൈ ഒരുപാട് മുന്നിലാണ്. ആര്‍സിബിക്കെതിരെ 33 മത്സരങ്ങളില്‍ മുഖാമുഖം വന്നപ്പോല്‍ 21 മത്സരങ്ങളിലും ചെന്നൈ ജയിച്ചു. 11 മത്സരം മാത്രമാണ് ആര്‍സിബിക്ക് ജയിക്കാന്‍ സാധിച്ചത്.
ഒരു മത്സരത്തില്‍ ഫലമുണ്ടായില്ല. ചെപ്പോക്കില്‍ നടന്ന അവസാന എട്ട് മത്സരങ്ങളിലും ചെന്നൈക്കായിരുന്നു ജയം. കഴിഞ്ഞ വര്‍ഷം ചിന്നസ്വാമി സ്റ്റേഡിയത്തിലാണ് ഇരുവരും അവസാനമായി കളിച്ചത്. അന്ന് ആര്‍സിബി 27 റണ്‍സിന് ജയിച്ചിരുന്നു.