നടൻ ദിലീപിന്റെ കരിയറിലെ 150-ാമത് ചിത്രമെന്ന പ്രത്യേകതയുമായി തിയറ്ററുകളിൽ എത്തിയ സിനിമയാണ് പ്രിൻസ് ആൻഡ് ഫാമിലി. ഫാമിലി ജോണറിലെത്തിയ ചിത്രം ചിരിയ്ക്ക് വക നൽകുന്നതാണെന്നാണ് പ്രേക്ഷകർ ഒന്നടങ്കം പറയുന്നത്.
നവാഗതനായ ബിന്റോ സ്റ്റീഫൻ സംവിധാനം ചെയ്ത ചിത്രം ആദ്യദിനം മുതൽ ബോക്സ് ഓഫീസിലും മികച്ച പ്രകടനമാണ് കാഴ്ചവയ്ക്കുന്നതെന്ന് കണക്കുകളിൽ നിന്നും വ്യക്തം.
ഈ അവസരത്തിൽ റിലീസ് ചെയ്ത് മൂന്ന് ദിവസത്തിൽ പ്രിൻസ് ആൻഡ് ഫാമിലി നേടിയ കളക്ഷൻ വിവരങ്ങൾ പുറത്തുവരികയാണ്. പ്രമുഖ ട്രാക്കിംഗ് സൈറ്റായ സാക്നിൽക്കിന്റെ റിപ്പോർട്ട് പ്രകാരം മൂന്നാം ദിവസമായ ഇന്നലെ 1.72 കോടിയാണ് പ്രിൻസ് നേടിയിരിക്കുന്നത്. ആദ്യദിനം 1.01 കോടിയും രണ്ടാം ദിനം 1.32 കോടിയും ചിത്രം നേടിയെന്നാണ് റിപ്പോർട്ട്.
മൂന്ന് ദിവസത്തെ ഇന്ത്യ നെറ്റ് കളക്ഷൻ 3.67 കോടി രൂപയാണ്. ആഗോള തലത്തിൽ 4.18 കോടി രൂപ പ്രിൻസ് ആൻഡ് ഫാമിലി നേടിയിട്ടുണ്ട്.
മോഹൻലാൽ ചിത്രം തുടരും പതിനെട്ടാം ദിനവും മികച്ച ബുക്കിങ്ങും കളക്ഷനും നേടി മുന്നേറുന്നതിനിടെയാണ് ദിലീപ് പടവും മികച്ച പ്രതികരണം നേടി മുന്നേറുന്നത് എന്നതും ശ്രദ്ധേയമാണ്. ദിലീപ് ചിത്രത്തിന് മികച്ച ബുക്കിങ്ങും നടക്കുന്നുണ്ടെന്നാണ് കണക്കുകളിൽ നിന്നും വ്യക്തമാകുന്നതും.