ഇറാനുമായുള്ള യുദ്ധം നാലാഴ്ച പിന്നിട്ടിട്ടും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന് രാഷ്ട്രീയമായി നേട്ടമുണ്ടാക്കാനായില്ല. ഇറാനിലെ ഭരണമാറ്റം ലക്ഷ്യമിട്ടുള്ള സൈനിക നീക്കങ്ങൾ പൂർണ്ണ വിജയം കാണാത്തത് സർക്കാരിന്റെ ജനപ്രീതി കുറച്ചു.
ഈ സാഹചര്യത്തിൽ, ഭരണം നഷ്ടപ്പെടാതിരിക്കാനും രാജ്യം പൊതുതിരഞ്ഞെടുപ്പിലേക്ക് നീങ്ങുന്നത് തടയാനും നെതന്യാഹു തീവ്രശ്രമം നടത്തുകയാണ്.
ഇസ്രായേൽ നിയമമനുസരിച്ച് മാർച്ച് 31-നകം ബജറ്റ് പാസാക്കാൻ സാധിച്ചില്ലെങ്കിൽ സഭ പിരിച്ചുവിടുകയും 90 ദിവസത്തിനകം തിരഞ്ഞെടുപ്പ് നടത്തേണ്ടി വരികയും ചെയ്യും. ഈ രാഷ്ട്രീയ പ്രതിസന്ധി ഒഴിവാക്കാൻ 225 ബില്യൺ ഡോളറിന്റെ പ്രതിരോധ ബജറ്റ് അംഗീകരിക്കണമെന്ന് നെതന്യാഹു സഖ്യകക്ഷികളോട് ആവശ്യപ്പെട്ടു.
യുദ്ധസാഹചര്യത്തിൽ ഉത്തരവാദിത്തം കാട്ടണമെന്നും സെപ്റ്റംബർ-ഒക്ടോബർ വരെ കാലാവധി പൂർത്തിയാക്കാൻ അനുവദിക്കണമെന്നുമാണ് അദ്ദേഹത്തിന്റെ ആവശ്യം.പുതിയ സർവേകൾ പ്രകാരം നെതന്യാഹുവിനും ലിക്വിഡ് പാർട്ടിക്കും കനത്ത തിരിച്ചടിയാണ് പ്രവചിക്കപ്പെടുന്നത്.
തിരഞ്ഞെടുപ്പ് നടന്നാൽ നിലവിലെ 34 സീറ്റുകളിൽ നിന്ന് ലിക്വിഡ് പാർട്ടി 28-ലേക്ക് കൂപ്പുകുത്തുമെന്നും, ഭരണസഖ്യം കേവലഭൂരിപക്ഷത്തിന് ആവശ്യമായ 61 സീറ്റുകൾ നേടില്ലെന്നും സർവേകൾ സൂചിപ്പിക്കുന്നു. ഖമനെയിയുടെ വധത്തിന് പിന്നാലെ രാഷ്ട്രീയ നേട്ടം പ്രതീക്ഷിച്ചെങ്കിലും, അഞ്ചാം ആഴ്ചയിലും ഇറാന്റെ പ്രതിരോധം ശക്തമായി തുടരുന്നത് തിരിച്ചടിയായി.
യുദ്ധത്തിലൂടെ ജനശ്രദ്ധ തിരിക്കാനാവാത്ത സാഹചര്യത്തിൽ, എങ്ങനെയെങ്കിലും ബജറ്റ് പാസാക്കി അധികാരം നിലനിർത്താനാണ് നെതന്യാഹുവിന്റെ നീക്കം.