വ്യക്തമായ കാരണങ്ങളില്ലാതെ 40 ദിവസത്തേക്ക് വ്യോമപാത അടച്ചിട്ടുള്ള ചൈനയുടെ നീക്കം ആഗോളതലത്തിൽ വലിയ ആശങ്കയുണ്ടാക്കുന്നു. തായ്വാൻ അതിർത്തിയിൽ മാർച്ച് 27 മുതൽ മെയ് 6 വരെ നീളുന്ന ഈ ദീർഘകാല നിയന്ത്രണം അസാധാരണമാണ്.
സാധാരണ കുറഞ്ഞ ദിവസത്തേക്ക് മാത്രം സൈനികാഭ്യാസങ്ങൾ നടത്താറുള്ള ചൈനയുടെ ഈ മാറ്റം, തായ്വാനെ ലക്ഷ്യമിട്ടുള്ള വലിയ സൈനിക നീക്കത്തിന്റെ ഭാഗമാണോ എന്നാണ് അന്താരാഷ്ട്ര സമൂഹം ഉറ്റുനോക്കുന്നത്.
യെല്ലോ സീ, ഈസ്റ്റ് ചൈന സീ മേഖലകളിൽ തായ്വാനേക്കാൾ വലിയ വിസ്തൃതിയിലാണ് ചൈന നിയന്ത്രണം ഏർപ്പെടുത്തിയിരിക്കുന്നത്. വിമാനങ്ങൾക്ക് ഉയരപരിധിയില്ലാത്ത (SFC-UNL) ഈ അസാധാരണ നടപടിയിൽ ചൈനീസ് അധികൃതർ ഇതുവരെ ഔദ്യോഗിക വിശദീകരണം നൽകിയിട്ടില്ല.
നിലവിൽ സിവിൽ വിമാനങ്ങളെ ബാധിച്ചിട്ടില്ലെങ്കിലും, ‘നോട്ടാം’ (NOTAM) മുന്നറിയിപ്പ് പുറപ്പെടുവിച്ചത് വലിയൊരു സൈനിക നീക്കത്തിന്റെ സൂചനയാണോ എന്ന് ലോകം ഭീതിയോടെ ഉറ്റുനോക്കുന്നു.
ഈ നീക്കം വെറുമൊരു സൈനികാഭ്യാസമല്ലെന്നും, തായ്വാനെതിരെയുള്ള ഭാവി യുദ്ധത്തിനുള്ള തയ്യാറെടുപ്പാണെന്നുമാണ് വിദഗ്ധരുടെ വിലയിരുത്തൽ. മിഡിൽ ഈസ്റ്റിലെ സംഘർഷങ്ങളിൽ അമേരിക്ക ശ്രദ്ധ കേന്ദ്രീകരിച്ചിരിക്കുന്ന സാഹചര്യം ചൈന മുതലെടുക്കുകയാണെന്ന് തായ്വാൻ ഭയക്കുന്നു.
ട്രംപും ഷി ജിൻപിംഗും തമ്മിലുള്ള ചർച്ചകൾ വൈകുന്ന പശ്ചാത്തലത്തിൽ, ഈ ദീർഘകാല വ്യോമനിയന്ത്രണം ചൈനയുടെ തന്ത്രപരമായ നീക്കമായി കരുതപ്പെടുന്നു.