ഉത്തരകൊറിയയുടെ മിസൈൽ പരീക്ഷണത്തെ ദക്ഷിണകൊറിയ ശക്തമായി അപലപിച്ചു. ഐക്യരാഷ്ട്രസഭയുടെ പ്രമേയങ്ങൾ ലംഘിച്ച പരീക്ഷണത്തെത്തുടർന്ന് ദക്ഷിണകൊറിയ അടിയന്തര സുരക്ഷാ യോഗം വിളിച്ചു.
അതേസമയം, പ്യോങ്യാങ്ങിൽ നിന്ന് തൊടുത്ത മിസൈൽ വിക്ഷേപണത്തിന് പിന്നാലെ തകർന്നതായും റിപ്പോർട്ടുകളുണ്ട്.നയതന്ത്ര ചർച്ചകളിലൂടെ പ്രശ്നപരിഹാരമുണ്ടാകുമെന്ന ദക്ഷിണകൊറിയയുടെ പ്രതീക്ഷകളെ ഉത്തരകൊറിയ തള്ളി.
ദക്ഷിണകൊറിയ തങ്ങളുടെ പ്രധാന ശത്രുവായി തുടരുമെന്നും സമാധാന നീക്കങ്ങൾ വെറും വ്യാമോഹമാണെന്നും പ്യോങ്യാങ് വ്യക്തമാക്കി. കിം യോ ജോങ്ങിന്റെ പ്രസ്താവന സമാധാന സന്ദേശമല്ല, മറിച്ച് സോളിനുള്ള താക്കീതാണെന്നും ഉത്തരകൊറിയൻ വിദേശകാര്യ മന്ത്രാലയം തുറന്നടിച്ചു.യുഎൻ ഉപരോധങ്ങൾ ലംഘിച്ച് ഉത്തരകൊറിയ മിസൈൽ പരീക്ഷണം തുടരുന്നത് മേഖലയിലെ സമാധാന നീക്കങ്ങൾക്ക് തിരിച്ചടിയായി.
ഇത് തങ്ങളുടെ പരമാധികാര അവകാശമാണെന്ന് പ്യോങ്യാങ് വാദിക്കുന്നു. ചർച്ചകൾക്കുള്ള സാധ്യത തള്ളിയ ഉത്തരകൊറിയ, ദക്ഷിണകൊറിയക്കുള്ള താക്കീതായാണ് ഈ നടപടികളെ വിശേഷിപ്പിച്ചത്. ഇതോടെ നയതന്ത്ര ചർച്ചകൾ വീണ്ടും പ്രതിസന്ധിയിലായി.