യുഎസ്-ഇറാൻ ചർച്ചകൾ 21 മണിക്കൂർ പിന്നിട്ടിട്ടും തീരുമാനമാകാത്തത് ആഗോള വിപണിയിൽ ആശങ്ക വർധിപ്പിക്കുന്നു. സംഘർഷം തുടരുന്നത് ക്രൂഡ് ഓയിൽ വില കുത്തനെ ഉയരാനും സ്വർണം, ഓഹരി വിപണികളെ ബാധിക്കാനും കാരണമാകും.
ഹോർമുസിൽ ടോൾ പിരിവ് തുടരുമെന്ന ഇറാന്റെ നിലപാട് വിപണിയിൽ കൂടുതൽ ആഘാതം സൃഷ്ടിക്കുമെന്ന് വിദഗ്ധർ മുന്നറിയിപ്പ് നൽകുന്നു.യുഎസ്-ഇറാൻ സമാധാന ചർച്ചകൾ പരാജയപ്പെട്ടതോടെ ഇറാനെതിരെ നാവിക ഉപരോധം ഏർപ്പെടുത്തുമെന്ന് ഡൊണാൾഡ് ട്രംപ് മുന്നറിയിപ്പ് നൽകി.
ഇറാന്റെ എണ്ണ കയറ്റുമതി പൂർണ്ണമായും തടയുന്ന തരത്തിൽ ‘വെനസ്വേലൻ മോഡൽ’ സാമ്പത്തിക ഉപരോധം നടപ്പിലാക്കാനാണ് യുഎസ് നീക്കം.
ഇത് അന്താരാഷ്ട്ര വിപണിയിൽ ക്രൂഡ് ഓയിൽ വില കുത്തനെ ഉയരാൻ കാരണമായേക്കും.ഉപരോധങ്ങൾ മറികടക്കാൻ ‘ഡാർക്ക് ഫ്ളീറ്റ്’ കപ്പലുകളെയാണ് ഇറാൻ നിലവിൽ ആശ്രയിക്കുന്നത്. വിപണിയിലെ ക്രൂഡ് ഓയിൽ ലഭ്യത ഉറപ്പാക്കാൻ യുഎസ് നൽകിയ ഇളവുകൾ പ്രയോജനപ്പെടുത്തി ഇന്ത്യ ഏഴു വർഷത്തിന് ശേഷം ഇറാനിൽ നിന്ന് എണ്ണ വാങ്ങാൻ തുടങ്ങിയിരുന്നു.
എന്നാൽ, ട്രംപ് നാവിക ഉപരോധം ഏർപ്പെടുത്തിയാൽ എണ്ണവരവ് പരിമിതപ്പെടുകയും അന്താരാഷ്ട്ര വിപണിയിൽ വില വർധനയ്ക്കും ഓഹരി വിപണികളിൽ ഇടിവിനും അത് കാരണമാവുകയും ചെയ്യും. 208 ദശലക്ഷം ബാരൽ ക്രൂഡ് ഓയിൽ ശേഖരമാണ് ഇറാന്റെ പക്കലുള്ളത്.
പ്രതിദിനം 1.5 ദശലക്ഷം ബാരൽ ക്രൂഡ് ഓയിൽ കയറ്റുമതി ചെയ്യുന്ന ഇറാന്റെ വിപണിയിലെ സാന്നിധ്യം കുറയുന്നത് വലിയ പ്രതിസന്ധിക്ക് കാരണമാകും. ഇറാന്റെ പക്കൽ നിലവിൽ 208 ദശലക്ഷം ബാരൽ എണ്ണശേഖരമുണ്ട്. ഇറാനെതിരെയുള്ള യുഎസ് സൈനിക നീക്കം പശ്ചിമേഷ്യയിൽ വീണ്ടും യുദ്ധം പടരാനും നിക്ഷേപകരുടെ ആത്മവിശ്വാസം തകർക്കാനും ഇടയാക്കുമെന്ന് വിദഗ്ധർ വിലയിരുത്തുന്നു.