ന്യൂഡല്‍ഹി: നീറ്റ് ചോദ്യപേപ്പര്‍ ചോര്‍ച്ചയുമായി ബന്ധപ്പെട്ട് ബിഹാറിൽ നാല് വിദ്യാർത്ഥികൾ കൂടി അറസ്റ്റിലായി. വിദ്യാർത്ഥികളോട് നടത്തിയ ചോദ്യം ചെയ്യലിൽ നിന്നു പുറത്ത് വന്ന വിവരങ്ങൾ തികച്ചും ഗുരുതരമായവയാണ്. ചോദ്യം ചെയ്യലിനിടെ, പരീക്ഷയ്ക്ക് തലേദിവസം തന്നെ ചോദ്യപ്പേപ്പറുകളും ഉത്തരങ്ങളും ലഭിച്ചതായി വിദ്യാർത്ഥികൾ സമ്മതിച്ചു.
ബിഹാറിലെ സാമ്പത്തിക കുറ്റാന്വേഷണ വിഭാഗമാണ് ഈ വിദ്യാർത്ഥികളെ അറസ്റ്റ് ചെയ്തത്. തങ്ങളുടെ മൊഴിയിൽ, പലർക്കും അടുത്ത ബന്ധുക്കളുടെ സഹായത്തോടെയാണു ചോദ്യപ്പേപ്പറുകൾ ലഭിച്ചതെന്ന് വിദ്യാർത്ഥികൾ വ്യക്തമാക്കി.
നീറ്റ് ക്രമക്കേടുമായി ബന്ധപ്പെട്ട് ബിഹാറിൽ മാത്രം ഇതുവരെ 17 പേർ അറസ്റ്റിലായതായും, ഈ ചോദ്യപ്പേപ്പർ ചോര്‍ച്ചയിലെ നവീന വെളിപ്പെടുത്തലുകൾ അന്വേഷണസംഘത്തിന് പ്രതികൾക്കെതിരെ ശക്തമായ തെളിവുകളായും കണക്കാക്കപ്പെടുന്നുവെന്നും അധികൃതർ അറിയിച്ചു.