ടെക്സസ്: കോപ്പ അമേരിക്ക ഫുട്ബോൾ ടൂർണമെന്റിൽ വെനസ്വേലയ്ക്കും ഇക്വഡോറിനും വിജയം. ഇന്ന് നടന്ന മത്സരത്തിൽ ജമൈക്കയെ ഒന്നിനെതിരെ മൂന്ന് ഗോളുകൾക്ക് തകർത്താണ് ഇക്വഡോർ വിജയം സ്വന്തമാക്കിയത്. മത്സരത്തിന്റെ 13-ാം മിനിറ്റിൽ തന്നെ ഇക്വഡോർ മുന്നിലെത്തി. ജമൈക്ക താരം കാസി പാമറിന്റെ സെൽഫ് ഗോളിലാണ് ഇക്വഡോർ സംഘം മുന്നിലെത്തിയത്.
ആദ്യ പകുതി അവസാനിക്കും മുമ്പ് കെൻഡ്രി പാഇസ് ഇക്വഡോറിനെ വീണ്ടും മുന്നിലെത്തിച്ചു. പെനാൽറ്റിയിലൂടെ ആയിരുന്നു ഗോൾ പിറന്നത്. 54-ാം മിനിറ്റിൽ മൈക്കല്‍ അന്റോണിയോയിലുടെ ജമൈക്ക ഒരു ഗോൾ തിരിച്ചടിച്ചു. എന്നാൽ സമനില പിടിക്കാൻ ജമൈക്കൻ സംഘത്തിന് കഴിഞ്ഞില്ല. ഒടുവിൽ 91-ാം മിനിറ്റിലെ അലൻ മിൻഡയുടെ ഗോളിൽ ഇക്വഡോർ മത്സരം സ്വന്തമാക്കി.
മറ്റൊരു മത്സരത്തിൽ എതിരില്ലാത്ത ഒരു ഗോളിനാണ് മെക്സിക്കോയെ വെനസ്വേല പരാജയപ്പെടുത്തിയത്. 57-ാം മിനിറ്റിൽ ലഭിച്ച പെനാൽറ്റി സലോമോൻ റോണ്ടൻ വലയിലാക്കി. രണ്ട് വിജയങ്ങളോടെ വെനസ്വേല ക്വാർട്ടർ ഉറപ്പിച്ചു. ഓരോ വിജയങ്ങളുള്ള മെക്സിക്കോയ്ക്കും ഇക്വഡോറിനും അവസാന മത്സരം നിർണായകമായി.