കോഴിക്കോട് ചക്കിട്ടപ്പാറ സ്വദേശിയും ഒളിമ്പ്യനുമായ ജിൻസൺ ജോൺസൺ അത്ലറ്റിക് ട്രാക്കിനോട് വിട പറഞ്ഞു. 800 മീറ്റർ, 1500 മീറ്റർ ഓട്ടങ്ങളിലെ ദേശീയ റെക്കോർഡ് ഉടമയായ അദ്ദേഹം, 34-ാം വയസ്സിൽ ഫെയ്സ്ബുക്കിലൂടെയാണ് വിരമിക്കൽ പ്രഖ്യാപിച്ചത്.
മൂന്ന് ഏഷ്യൻ ഗെയിംസ് മെഡലുകളും രണ്ട് ഏഷ്യൻ ചാമ്പ്യൻഷിപ്പ് മെഡലുകളും നേടിയ ജിൻസൺ ജോൺസൺ, റിയോ ഒളിമ്പിക്സിലും ലോക ചാമ്പ്യൻഷിപ്പിലും പങ്കെടുത്തിട്ടുണ്ട്. മികച്ച കായിക നേട്ടങ്ങൾ പരിഗണിച്ച് 2018-ൽ രാജ്യം അദ്ദേഹത്തിന് അർജുന അവാർഡ് നൽകി ആദരിച്ചു.
2018-ൽ ശ്രീറാം സിങ്ങിന്റെ 42 വർഷം പഴക്കമുള്ള 800 മീറ്റർ റെക്കോഡ് (1:45.65) തകർത്താണ് ജിൻസൺ ചരിത്രം കുറിച്ചത്. അതേവർഷം 1500 മീറ്ററിലും ദേശീയ റെക്കോഡിട്ട അദ്ദേഹം പിന്നീട് ജർമ്മനിയിൽ വെച്ച് അത് 3:35.24 സെക്കൻഡായി മെച്ചപ്പെടുത്തി.
രണ്ട് ദശകത്തിലേറെ പഴക്കമുള്ള റെക്കോഡുകളാണ് ജിൻസന്റെ കുതിപ്പിൽ തിരുത്തിയെഴുതപ്പെട്ടത്.2018 ജക്കാർത്ത ഏഷ്യൻ ഗെയിംസിൽ സ്വർണ്ണവും വെള്ളിയും നേടിയ ജിൻസൺ, ഹാങ്ചൗവിൽ വെങ്കലവും സ്വന്തമാക്കി.
ഏഷ്യൻ ചാമ്പ്യൻഷിപ്പുകളിൽ വെള്ളിയും വെങ്കലവും നേടിയ അദ്ദേഹം 2018-ൽ ഏഷ്യയിലെ മികച്ച അത്ലറ്റായി തെരഞ്ഞെടുക്കപ്പെട്ടു. റിയോ ഒളിമ്പിക്സിലും ഇന്ത്യയെ പ്രതിനിധീകരിച്ച അദ്ദേഹം മികച്ച നേട്ടങ്ങളോടെയാണ് ട്രാക്കിനോട് വിടപറയുന്നത്.