ഇറാൻ കപ്പൽ യു.എസ് പിടിച്ചെടുത്തു

ഒമാൻ കടലിൽ മെഡിക്കൽ ഉപകരണങ്ങളുമായി പോയ ഇറാന്റെ ‘ടോസ്ക’ എന്ന വാണിജ്യ കപ്പൽ യുഎസ് സേന പിടിച്ചെടുത്തു. ഏപ്രിൽ 19-ന് നടന്ന ഈ നടപടി അന്താരാഷ്ട്ര നിയമങ്ങളുടെ ലംഘനമാണെന്ന് ഇറാൻ യുഎന്നിൽ കുറ്റപ്പെടുത്തി. ഡയാലിസിസ് സാമഗ്രികളുണ്ടായിരുന്ന കപ്പലിലെ ജീവനക്കാരെ യുഎസ് ബന്ദികളാക്കിയതായും ഇറാൻ ആരോപിച്ചു.

യുഎസ് നടപടി രാജ്യാന്തര നിയമങ്ങളുടെയും മനുഷ്യാവകാശങ്ങളുടെയും ലംഘനമാണെന്ന് ഇറാൻ എക്സിലൂടെ (X) പ്രതികരിച്ചു. ജീവൻരക്ഷാ മരുന്നുകൾ തടയുന്നതിലൂടെ സാധാരണക്കാരുടെ ജീവൻ അപകടത്തിലാക്കുകയാണെന്നും, നാവിഗേഷൻ സ്വാതന്ത്ര്യത്തെ തകർക്കുന്ന ഈ ക്രൂരതയ്ക്ക് പിന്നിലുള്ളവർ മറുപടി പറയണമെന്നും ഇറാൻ ആവശ്യപ്പെട്ടു.

യുഎസ് നടപടിക്കെതിരെ ഇറാൻ യുഎൻ സെക്രട്ടറി ജനറലിനും സുരക്ഷാ കൗൺസിലിനും ഔദ്യോഗികമായി പരാതി നൽകി. അന്താരാഷ്ട്ര ഇടപെടൽ വേണമെന്ന് ഇറാൻ കത്തിൽ ആവശ്യപ്പെട്ടു. എന്നാൽ, കപ്പലിലെ ചരക്കിനെക്കുറിച്ച് വ്യക്തമായ വിവരമില്ലെന്നും മേഖലയിലെ സാഹചര്യത്തിൽ ആശങ്കയുണ്ടെന്നും യുഎൻ വക്താവ് സ്റ്റീഫൻ ഡുജാറിക് പ്രതികരിച്ചു.

കടലിടുക്കിൽ യുഎസും ഇറാനും തുടർച്ചയായി കപ്പലുകൾ പിടിച്ചെടുക്കുന്നതിൽ യുഎൻ വക്താവ് സ്റ്റീഫൻ ഡുജാറിക് ആശങ്ക രേഖപ്പെടുത്തി. ഹോർമുസ് കടലിടുക്ക് അടച്ചിടുന്നത് ഗുരുതരമായ മാനുഷിക പ്രത്യാഘാതങ്ങൾ ഉണ്ടാക്കുമെന്നും ഗതാഗതം ഉടൻ പുനഃസ്ഥാപിക്കണമെന്നും അദ്ദേഹം ആവശ്യപ്പെട്ടു. മെഡിക്കൽ സാമഗ്രികൾ പിടിച്ചെടുത്തെന്ന ഇറാൻ്റെ ആരോപണത്തിൽ യുഎസ് ഇതുവരെ പ്രതികരിച്ചിട്ടില്ല.