ഏകദിനത്തില്‍ 49-ാം സെഞ്ചുറി തികച്ച്‌ തന്റെ റെക്കോഡിനൊപ്പമെത്തിയ കോലിക്ക് അഭിനന്ദനങ്ങളുമായി ക്രിക്കറ്റ് ഇതിഹാസം സച്ചിൻ തെണ്ടുല്‍ക്കര്‍.സമൂഹമാധ്യമങ്ങളില്‍ കോലിയുടെ ചിത്രം പങ്കുവെച്ചുകൊണ്ടാണ് സച്ചിൻ അഭിനന്ദനങ്ങള്‍ നേര്‍ന്നത്. കോലി നന്നായി കളിച്ചുവെന്ന് പ്രശംസിച്ച സച്ചിൻ അടുത്ത ദിവസങ്ങളില്‍ തന്റെ റെക്കോഡ് മറികടക്കുമെന്ന് പ്രതീക്ഷിക്കുന്നതായും കുറിച്ചു.
വിരാട് നന്നായി കളിച്ചു. 49-ല്‍ നിന്ന് 50 ലെത്തി അടുത്ത ദിവസങ്ങളില്‍ എന്റെ റെക്കോഡ് മറികടക്കുമെന്ന് ഞാൻ പ്രതീക്ഷിക്കുന്നു. അഭിനന്ദനങ്ങള്‍’- സച്ചിൻ കുറിച്ചു
2023 ഏകദിന ലോകകപ്പില്‍ ദക്ഷിണാഫ്രിക്കയ്ക്കെതിരായ മത്സരത്തില്‍ സെഞ്ചുറി നേടിയതോടെയാണ് കോലി ചരിത്രത്തിന്റെ ഭാഗമായത്. താരത്തിന്റെ 49-ാം ഏകദിന സെഞ്ചുറിയാണിത്. സച്ചിന്റെ അക്കൗണ്ടിലും 49 സെഞ്ചുറികളാണുള്ളത്. 290 ഏകദിന മത്സരങ്ങളില്‍ നിന്നാണ് കോലി 49 സെഞ്ചുറി നേടിയത്. സച്ചിൻ 463 മത്സരങ്ങള്‍ കളിച്ചാണ് 49 സെഞ്ചുറികള്‍ സ്വന്തമാക്കിയത്.