ഇറാനെതിരായ യുഎസ്-ഇസ്രായേൽ ആക്രമണങ്ങളിൽ ബ്രിട്ടൻ പങ്കുചേരില്ലെന്ന് പ്രധാനമന്ത്രി കെയ്ർ സ്റ്റാർമർ പാർലമെന്റിൽ പ്രഖ്യാപിച്ചു. രാജ്യത്തിന്റെ ദേശീയ താൽപ്പര്യവും പൗരന്മാരുടെ സുരക്ഷയും മുൻനിർത്തിയാണ് ഈ തീരുമാനമെന്നും അദ്ദേഹം വ്യക്തമാക്കി. മേഖലയിലെ സംഘർഷങ്ങളിൽ നിന്ന് വിട്ടുനിൽക്കാനാണ് ബ്രിട്ടന്റെ തീരുമാനം.
ബ്രിട്ടീഷ് സൈനിക താവളങ്ങൾ വിട്ടുനൽകാൻ വൈകിയെന്ന ട്രംപിന്റെ വിമർശനത്തിന്, രാജ്യതാൽപ്പര്യം സംരക്ഷിക്കുകയാണ് തന്റെ പ്രഥമ കടമയെന്ന് കെയ്ർ സ്റ്റാർമർ മറുപടി നൽകി. എന്നാൽ, അമേരിക്കൻ നീക്കങ്ങളോടുള്ള ബ്രിട്ടന്റെ നിലപാട് വ്യക്തമല്ലെന്ന് പ്രതിപക്ഷ നേതാവ് കെമി ബഡെനോച് പാർലമെന്റിൽ കുറ്റപ്പെടുത്തി.
ഇതോടെ വിഷയത്തിൽ ബ്രിട്ടീഷ് രാഷ്ട്രീയത്തിൽ ഭിന്നത രൂക്ഷമായി.നിയമപരമായ അടിത്തറയില്ലാതെ ബ്രിട്ടീഷ് സൈനികരെ അപകടത്തിലാക്കില്ലെന്ന് കെയ്ർ സ്റ്റാർമർ വ്യക്തമാക്കി. ആകാശത്തുനിന്നുള്ള ഭരണം മാറ്റുന്നതിനോ (Regime change) അനാവശ്യമായ സൈനിക ഇടപെടലുകൾക്കോ ബ്രിട്ടൻ താൽപ്പര്യപ്പെടുന്നില്ലെന്നും അദ്ദേഹം അറിയിച്ചു.
യുഎസിന്റെ സമ്മർദ്ദത്തിന് വഴങ്ങാതെ രാജ്യസുരക്ഷയ്ക്കാണ് മുൻഗണനയെന്ന് അദ്ദേഹം പാർലമെന്റിൽ ഉറപ്പിച്ചു പറഞ്ഞു.ബഹ്റൈനിലെയും സൈപ്രസിലെയും ബ്രിട്ടീഷ് താവളങ്ങൾക്ക് നേരെ ഇറാൻ ഡ്രോൺ ആക്രമണം നടത്തിയെന്ന് സ്റ്റാർമർ സ്ഥിരീകരിച്ചു.
എന്നാൽ, ബ്രിട്ടന്റെ നിലപാട് പ്രഖ്യാപിക്കുന്നതിന് മുൻപേ നടന്ന ആക്രമണങ്ങളാണിതെന്നും അദ്ദേഹം വ്യക്തമാക്കി. തിരിച്ചടികൾക്ക് മുതിരാതെ സംയമനം പാലിക്കാനാണ് ബ്രിട്ടന്റെ തീരുമാനം.
പശ്ചിമേഷ്യയിലുള്ള രണ്ട് ലക്ഷത്തോളം ബ്രിട്ടീഷ് പൗരന്മാരുടെ സുരക്ഷയ്ക്കാണ് സർക്കാർ പ്രഥമ പരിഗണന നൽകുന്നതെന്ന് സ്റ്റാർമർ വ്യക്തമാക്കി. യുദ്ധത്തേക്കാൾ ചർച്ചകളിലൂടെ പ്രശ്നപരിഹാരം കാണുന്നതാണ് ഉചിതമെന്ന് വിശ്വസിക്കുന്ന ബ്രിട്ടൻ, നിലവിലെ സംഘർഷങ്ങളിൽ നിന്ന് വിട്ടുനിൽക്കാൻ തീരുമാനിച്ചു.