ഇറാനിലെ പ്രക്ഷോഭം ശക്തമാകുന്ന പശ്ചാത്തലത്തിൽ സ്വീകരിക്കേണ്ട നടപടികളെക്കുറിച്ച് അമേരിക്കയിൽ ഉന്നതതല ചർച്ചകൾ സജീവം. രണ്ടാഴ്ച പിന്നിട്ട സർക്കാർ വിരുദ്ധ പ്രക്ഷോഭം കനക്കുന്ന സാഹചര്യത്തിൽ ഇറാനു മേൽ എന്ത് നിലപാട് സ്വീകരിക്കണമെന്നാണ് അമേരിക്കൻ ഭരണകൂടം ആലോചിക്കുന്നത്.
പ്രക്ഷോഭകർക്കെതിരെ ഇറാൻ സൈനിക നടപടി സ്വീകരിച്ചാൽ അമേരിക്ക ഇടപെടുമെന്ന് പ്രസിഡന്റ് ട്രംപ് നൽകിയ മുന്നറിയിപ്പ് എങ്ങനെ നടപ്പിലാക്കാമെന്നാണ് യുഎസ് ഭരണകൂടം ഇപ്പോൾ ചർച്ച ചെയ്യുന്നത്. ഇക്കാര്യത്തിൽ സ്വീകരിക്കേണ്ട സൈനികവും നയതന്ത്രപരവുമായ നീക്കങ്ങളെക്കുറിച്ച് ആലോചനകൾ നടക്കുന്നതായി ‘വാൾസ്ട്രീറ്റ് ജേർണൽ’ റിപ്പോർട്ട് ചെയ്യുന്നു.
ഇറാനിലെ സൈനിക കേന്ദ്രങ്ങളിൽ വ്യോമാക്രമണം നടത്തുന്നത് അമേരിക്കയുടെ പരിഗണനയിലുണ്ടെങ്കിലും വാഷിംഗ്ടണിൽ ഇക്കാര്യത്തിൽ ഏകാഭിപ്രായമില്ല. ഇസ്രായേൽ പ്രേരിതമായി ഇറാൻ ഇപ്പോൾ യുദ്ധസാഹചര്യത്തിലാണെന്നും അതുകൊണ്ട് തന്നെ വെടിനിർത്തലിനോ സമാധാനത്തിനോ പ്രസക്തിയില്ലെന്നും ഇറാൻ സുപ്രിം നാഷണൽ സെക്യൂരിറ്റി കൗൺസിൽ സെക്രട്ടറി അലി ലാരിജാനി വ്യക്തമാക്കി. 2026-ലെ നിലവിലെ സാഹചര്യത്തിൽ ഇറാൻ പ്രതിരോധ നിലപാടുകൾ ശക്തമാക്കുകയാണ്.
പ്രതിഷേധക്കാരെ പിടികൂടുമെന്ന് അയത്തുള്ള അലി ഖാംനഈ പ്രഖ്യാപിച്ചതോടെ ഇറാനിൽ സംഘർഷം രൂക്ഷമായി. പ്രതിഷേധത്തിൽ പങ്കെടുക്കുന്നവർ “ദൈവത്തിന്റെ ശത്രുക്കൾ” ആണെന്നും ഇവർക്ക് മരണശിക്ഷ വരെ നൽകുമെന്നും അറ്റോർണി ജനറൽ മഹമ്മദ് മോവാഹേദി അസാദ് മുന്നറിയിപ്പ് നൽകി.
തെഹ്റാൻ, മശ്ഹദ് തുടങ്ങി വിവിധ നഗരങ്ങളിൽ പ്രതിഷേധം ശക്തമാണ്. 14 സുരക്ഷാ ഉദ്യോഗസ്ഥരടക്കം 64 പേർ കൊല്ലപ്പെടുകയും ഇസ്രായേൽ ചാരന്മാരടക്കം ഇരുനൂറിലധികം പേർ അറസ്റ്റിലാവുകയും ചെയ്തു.