മണിപ്പൂരിൽ വീണ്ടും തീവെപ്പ്: പുതിയ സർക്കാരിന് വെല്ലുവിളിയായി ഉഖ്രുലിൽ സംഘർഷം

മണിപ്പൂരിൽ ബിജെപി സർക്കാർ അധികാരമേറ്റ് ഒരാഴ്ച തികയുമ്പോൾ കുക്കി – നാഗാ വിഭാഗങ്ങൾക്കിടയിൽ വീണ്ടും സംഘർഷം പൊട്ടിപ്പുറപ്പെട്ടു. കുക്കി എംഎൽഎമാർ പുതിയ സർക്കാരിന്റെ ഭാഗമായതിനെതിരെയാണ് പ്രതിഷേധം ശക്തമായത്. ഉഖ്രുലിൽ നിരവധി വീടുകൾക്ക് തീയിട്ടതോടെ അധികൃതർ കർഫ്യൂ പ്രഖ്യാപിച്ചു.

മണിപ്പൂരിലെ ചുരാചന്ദ്പൂരിലും പരിസരപ്രദേശങ്ങളിലും കുക്കി-നാഗ വിഭാഗങ്ങൾക്കിടയിൽ വീണ്ടും സംഘർഷം പൊട്ടിപ്പുറപ്പെട്ടത് അതീവ ഗുരുതരമായ സാഹചര്യമാണ് സൃഷ്ടിച്ചിരിക്കുന്നത്. ഇതിനെത്തുടർന്ന് കുക്കി മേഖലകളിൽ പ്രഖ്യാപിച്ച സമ്പൂർണ്ണ അടച്ചുപൂട്ടൽ ജനജീവിതത്തെ പൂർണ്ണമായും ബാധിച്ചു.

പുതിയ രാഷ്ട്രീയ നീക്കങ്ങളിലും അധികാര പങ്കാളിത്തത്തിലും പ്രതിഷേധിച്ചാണ് ഈ വിഭാഗങ്ങൾ തെരുവിലിറങ്ങിയത്. പ്രതിഷേധം അക്രമാസക്തമായതോടെ സുരക്ഷാസേന രംഗത്തിറങ്ങുകയും ഉഖ്‌രുൽ ഉൾപ്പെടെയുള്ള ജില്ലകളിൽ കർഫ്യൂ ഏർപ്പെടുത്തുകയും ചെയ്തു. കൂടുതൽ സംഘർഷങ്ങൾ ഒഴിവാക്കാൻ സർക്കാർ കനത്ത ജാഗ്രത തുടരുകയാണ്.

പുതിയ സർക്കാരിൽ കുക്കി പ്രതിനിധികൾ പങ്കാളികളായതിനെച്ചൊല്ലി മണിപ്പൂരിൽ പ്രതിഷേധം ശക്തമാകുന്നു. ഉപമുഖ്യമന്ത്രിയായി നെംച കിപ്‌ജെൻ ചുമതലയേറ്റതിനെതിരെ കുക്കി സംഘടനകൾ രംഗത്തെത്തിയിട്ടുണ്ട്. സമുദായത്തിന്റെ പ്രത്യേക ആവശ്യങ്ങൾ അംഗീകരിക്കാത്ത സർക്കാരിൽ പങ്കുചേരുന്നത് വഞ്ചനയാണെന്നാണ് ഇവരുടെ നിലപാട്.

മന്ത്രിസ്ഥാനം രാജിവെക്കുന്നതുവരെ സമരം തുടരുമെന്ന് പ്രഖ്യാപിച്ച സംഘടനകൾ, പ്രത്യേക ഭരണപ്രദേശം എന്ന ആവശ്യത്തിൽ വിട്ടുവീഴ്ചയില്ലെന്നും വ്യക്തമാക്കി. ഇതേത്തുടർന്ന് കുക്കി മേഖലകളിൽ ജനകീയ പ്രതിഷേധവും ഹർത്താലും തുടരുകയാണ്.

മണിപ്പൂരിൽ രാഷ്ട്രപതി ഭരണം അവസാനിപ്പിച്ച് ഫെബ്രുവരി 4-ന് യുംനാം ഖേംചന്ദ് സിംഗ് മുഖ്യമന്ത്രിയായി പുതിയ സർക്കാർ അധികാരമേറ്റെങ്കിലും വംശീയ തർക്കങ്ങൾ വീണ്ടും കടുക്കുകയാണ്. തങ്ങൾക്കായി പ്രത്യേക സ്വയംഭരണ പ്രദേശം വേണമെന്ന കുക്കി വിഭാഗത്തിന്റെ ആവശ്യവും, സംസ്ഥാനത്തിന്റെ അഖണ്ഡത തകർക്കാൻ അനുവദിക്കില്ലെന്ന മെയ്തെയ് സംഘടനകളുടെ ഉറച്ച നിലപാടുമാണ് നിലവിലെ പ്രധാന പ്രതിസന്ധി.

അധികാര പങ്കാളിത്തത്തെച്ചൊല്ലിയുള്ള കുക്കി സംഘടനകളുടെ പ്രതിഷേധം കൂടി ചേർന്നതോടെ സംസ്ഥാനം വീണ്ടും കനത്ത സുരക്ഷാ നിഴലിലായിരിക്കുകയാണ്.പുതിയ സർക്കാരിൽ നെംചാ കിപ്‌ജെൻ (കുക്കി), ലോസി ഡിഖോ (നാഗ) എന്നിവർ ഉപമുഖ്യമന്ത്രിമാരായും, ഗോവിന്ദദാസ് ആഭ്യന്തരമന്ത്രിയായും ചുമതലയേറ്റു.

എന്നാൽ, അധികാര പങ്കാളിത്തത്തിന് പിന്നാലെ വംശീയ ചേരിതിരിവ് ശക്തമായത് മുഖ്യമന്ത്രി യുംനാം ഖേംചന്ദ് സിംഗിന് വലിയ വെല്ലുവിളിയാണ്. സമുദായങ്ങൾക്കിടയിലെ ഭിന്നത പരിഹരിച്ച് സമാധാനം പുനഃസ്ഥാപിക്കുക എന്നത് പുതിയ ഭരണകൂടത്തിന് മുന്നിലെ കഠിനമായ ദൗത്യമായി തുടരുന്നു.