യുഡിഎഫ് വിജയത്തിന് പിന്നാലെ കേരളത്തിൽ മുഖ്യമന്ത്രിയെ കണ്ടെത്താനുള്ള എ.ഐ.സി.സി നീക്കം ഊർജ്ജിതമായി. വി.ഡി. സതീശൻ, രമേശ് ചെന്നിത്തല, കെ.സി. വേണുഗോപാൽ എന്നിവർക്കായി ഗ്രൂപ്പ് പോര് മുറുകുമ്പോൾ, ഹൈക്കമാൻഡ് സമവായത്തിന് ശ്രമിക്കുകയാണ്.
എംഎൽഎമാരുടെ പിന്തുണയിൽ വേണുഗോപാൽ പക്ഷം മുന്നിലെന്ന് അവകാശപ്പെടുമ്പോഴും, ചെന്നിത്തലയും സതീശനും തങ്ങളുടെ സ്വാധീനം ഉറപ്പിക്കാനുള്ള ചർച്ചകളിലാണ്.
മുഖ്യമന്ത്രിയെ നിശ്ചയിക്കുന്നതിൽ ഘടകകക്ഷികളുടെ നിലപാട് തേടാൻ എ.ഐ.സി.സി തീരുമാനിച്ചു.
വി.ഡി. സതീശനെ പിന്തുണച്ച് കെ.എം. ഷാജി രംഗത്തെത്തിയപ്പോൾ, മുൻകാല പരീക്ഷണങ്ങൾ ആവർത്തിക്കരുതെന്ന നിലപാടിലാണ് മുതിർന്ന നേതാക്കൾ. മന്ത്രിസഭാ രൂപീകരണത്തിൽ മെറിറ്റിന് മുൻഗണന നൽകണമെന്ന് രാഹുൽ ഗാന്ധി കർശന നിർദ്ദേശം നൽകിയിട്ടുണ്ട്. ഇന്ന് വൈകീട്ട് ലീഗ് ഉൾപ്പെടെയുള്ള കക്ഷികളുമായി നിരീക്ഷകർ ചർച്ച നടത്തും.
തിരുവനന്തപുരത്ത് മുതിർന്ന നേതാക്കൾ എത്തിയതോടെ ചർച്ചകൾ ചൂടുപിടിച്ചു. എന്നാൽ തെരുവിലെ പോസ്റ്റർ യുദ്ധത്തിലും ചേരിതിരിവിലും ഹൈക്കമാൻഡ് അതൃപ്തിയിലാണ്.
ആദ്യം മുഖ്യമന്ത്രിയെയും ഘടകകക്ഷി മന്ത്രിമാരെയും സത്യപ്രതിജ്ഞ ചെയ്യിക്കാനാണ് നീക്കം. കോൺഗ്രസ് മന്ത്രിമാരുടെ കാര്യത്തിൽ വിശദമായ ചർച്ചകൾക്ക് ശേഷമേ പ്രഖ്യാപനമുണ്ടാകൂ.