പാകിസ്ഥാനിലെ ഭക്കർ ജില്ലയിലുള്ള ദരിയ ഖാൻ ഗ്രാമത്തിൽ താമസിച്ചിരുന്ന മുഹമ്മദ് ആരിഫ്, മുഹമ്മദ് ഫർമാൻ അലി എന്നീ സഹോദരങ്ങൾ ലോകത്തെ നടുക്കിയത് നൂറിലധികം മൃതദേഹങ്ങൾ ഖബറുകളിൽ നിന്ന് പുറത്തെടുത്ത് ഭക്ഷിച്ചതിലൂടെയാണ്.
2011-ൽ ആദ്യമായി പിടിയിലാകുമ്പോൾ ഇവരുടെ വീട്ടിൽ നിന്ന് പകുതി ഭക്ഷിച്ച നിലയിൽ ഒരു സ്ത്രീയുടെ മൃതദേഹം കണ്ടെത്തിയിരുന്നു. രണ്ട് വർഷത്തെ ജയിൽ ശിക്ഷ കഴിഞ്ഞ് പുറത്തിറങ്ങിയ ഇവർ 2014-ൽ വീണ്ടും നരഭോജനം തുടർന്നു; ഇത്തവണ ഒരു കുഞ്ഞിന്റെ തലയാണ് ഇവരുടെ വീട്ടിൽ നിന്നും പോലീസ് കണ്ടെടുത്തത്.
പാക് നിയമത്തിൽ നരഭോജനത്തിന് പ്രത്യേക വകുപ്പുകളില്ലാത്തതിനാൽ മൃതദേഹങ്ങളോടുള്ള അനാദരവിനാണ് ഇവർക്ക് ശിക്ഷ ലഭിച്ചത്.2011 ഏപ്രിലിൽ പാകിസ്ഥാനിലെ ഭക്കർ ജില്ലയിലുണ്ടായ ഈ സംഭവം ഗ്രാമത്തെ ഒന്നടങ്കം ഭീതിയിലാഴ്ത്തി.
തലേദിവസം അടക്കം ചെയ്ത 24 വയസ്സുള്ള യുവതിയുടെ മൃതദേഹം ഖബറിനുള്ളിൽ നിന്ന് അപ്രത്യക്ഷമായത് വലിയ ചർച്ചകൾക്ക് വഴിവെച്ചു. ഖബർ മാന്തി മൃതദേഹം പുറത്തെടുത്ത നിലയിൽ കണ്ട നാട്ടുകാർക്കും പള്ളി അധികൃതർക്കും ഇത് ഒരു മനുഷ്യന്റെ പ്രവൃത്തിയാകില്ലെന്ന തോന്നൽ വരെ ഉണ്ടായെങ്കിലും, അന്വേഷണം മുഹമ്മദ് ആരിഫ്, മുഹമ്മദ് ഫർമാൻ അലി എന്നീ സഹോദരങ്ങളിലേക്ക് എത്തുകയായിരുന്നു. മൃതദേഹം എന്തിന് മോഷ്ടിക്കപ്പെട്ടു എന്ന ചോദ്യത്തിന് നരഭോജനം എന്ന അതിഭീകരമായ ഉത്തരമാണ് പിന്നീട് പുറത്തുവന്നത്.
പൊലീസ് അന്വേഷണം ഊർജിതമാക്കിയതോടെ മൃതദേഹം നീക്കം ചെയ്തത് മൃഗങ്ങളല്ലെന്നും മനുഷ്യർ തന്നെയാണെന്നും തെളിഞ്ഞു. സംസ്കാര ചടങ്ങുകൾ നടന്ന സമയത്ത് സംശയകരമായ സാഹചര്യത്തിൽ രണ്ട് യുവാക്കളെ കണ്ടുവെന്ന ദൃക്സാക്ഷികളുടെ മൊഴികൾ കേസിൽ നിർണ്ണായകമായി. ദൂരെ മാറിനിന്ന് ചടങ്ങുകൾ നിരീക്ഷിച്ചിരുന്ന ഇവരുടെ പെരുമാറ്റത്തിൽ നാട്ടുകാർക്കും സംശയം തോന്നിയിരുന്നു. ഈ സൂചനകൾ പിന്തുടർന്ന പൊലീസ് അന്വേഷണം മുഹമ്മദ് ആരിഫ്, മുഹമ്മദ് ഫർമാൻ അലി എന്നീ സഹോദരങ്ങളിലേക്ക് എത്തുകയും, അവരുടെ വീട്ടിൽ നടത്തിയ പരിശോധനയിൽ മനുഷ്യമാംസം പാകം ചെയ്തതിന്റെ ഞെട്ടിക്കുന്ന തെളിവുകൾ കണ്ടെത്തുകയും ചെയ്തു.