പശ്ചിമേഷ്യൻ സംഘർഷം ചർച്ച ചെയ്യാൻ ഇറാൻ വിദേശകാര്യ മന്ത്രി അബ്ബാസ് അരാഗ്ചി പാകിസ്താനിലെത്തി. യുഎസുമായി നേരിട്ടുള്ള ചർച്ചകൾക്ക് ഇറാൻ തയ്യാറല്ലെന്ന് വ്യക്തമാക്കിയ അദ്ദേഹം, തങ്ങളുടെ നിലപാടുകൾ പാകിസ്താൻ വഴി അമേരിക്കയെ അറിയിക്കാനാണ് തീരുമാനിച്ചിരിക്കുന്നത്. നയതന്ത്ര ചർച്ചകൾ പുനരുജ്ജീവിപ്പിക്കുക എന്ന ലക്ഷ്യത്തോടെയാണ് ഈ സന്ദർശനം.
ആണവ പദ്ധതികളിലും എണ്ണക്കടത്തിലും അമേരിക്ക കടുത്ത നിബന്ധനകൾ വെക്കുമ്പോഴും, സമാധാന ഉടമ്പടിക്ക് സാധ്യതയുണ്ടെന്ന് പ്രസിഡന്റ് ഡൊണാൾഡ് ട്രംപ് സൂചിപ്പിച്ചു.
ഇതിന്റെ ഭാഗമായി യുഎസ് പ്രതിനിധികളായ സ്റ്റീവ് വിറ്റ്കോഫും ജാരെദ് കുഷ്നറും ചർച്ചകൾക്കായി പാകിസ്താനിലെത്തും. എന്നാൽ, ഇത്തവണത്തെ കൂടിക്കാഴ്ചയിൽ ജെ.ഡി വാൻസും മുഹമ്മദ് ബാഗർ ഗാലിബാഫും പങ്കെടുക്കില്ല.
പാകിസ്താന്റെ മധ്യസ്ഥതയിൽ ചർച്ചകൾ നടക്കുമെന്ന് വൈറ്റ് ഹൗസ് സ്ഥിരീകരിച്ചു. യുറേനിയം ഉപേക്ഷിക്കുക, എണ്ണനീക്കം സുഗമമാക്കുക എന്നീ നിബന്ധനകളിൽ ട്രംപ് ഉറച്ചുനിൽക്കുമ്പോൾ, ഹോർമുസ് കടലിടുക്കിലെ ഉപരോധം നീക്കണമെന്ന നിലപാടിലാണ് ഇറാൻ. പാകിസ്താൻ സൈനിക മേധാവി നേരത്തെ നടത്തിയ ഇറാൻ സന്ദർശനമാണ് ഇപ്പോൾ ഇസ്ലാമാബാദിൽ നടക്കുന്ന ഉന്നതതല ചർച്ചകൾക്ക് വഴിയൊരുക്കിയത്.