മലയാള സിനിമയിലെ പ്രിയ സംഗീത സംവിധായകൻ എസ്.പി. വെങ്കിടേഷിന്റെ വിയോഗം ചലച്ചിത്ര ലോകത്തെ ദുഃഖത്തിലാഴ്ത്തി. രാഘവൻ മാസ്റ്റർ ഉൾപ്പെടെയുള്ള പ്രമുഖർക്കൊപ്പം മാൻഡലിൻ വായിച്ചും അസിസ്റ്റന്റ് മ്യൂസിക് ഡയറക്ടറായും പ്രവർത്തിച്ചാണ് അദ്ദേഹം കരിയർ തുടങ്ങിയത്. ‘
ടി.പി. ബാലഗോപാലൻ എം.എ’ എന്ന ചിത്രത്തിൽ എ.ടി. ഉമ്മറിന്റെ സഹായിയായി പശ്ചാത്തല സംഗീതമൊരുക്കിയ അദ്ദേഹം, പിന്നീട് ഡെന്നിസ് ജോസഫ്-തമ്പി കണ്ണന്താനം കൂട്ടുകെട്ടിലൂടെയാണ് മലയാളത്തിൽ സജീവമായത്.
തമ്പി കണ്ണന്താനത്തിന്റെ ‘രാജാവിന്റെ മകൻ’ എന്ന ചിത്രത്തിലൂടെ സ്വതന്ത്ര സംഗീത സംവിധായകനായി മാറിയ അദ്ദേഹം മലയാള സിനിമയുടെ സുവർണ്ണകാലത്തെ നിരവധി ഹിറ്റുകൾക്ക് ഈണം പകർന്നു.എസ്.പി. വെങ്കിടേഷ് ഒരുക്കിയ സംഗീതവും പശ്ചാത്തല സംഗീതവും മലയാളികളെ അത്രമേൽ ത്രസിപ്പിച്ചവയായിരുന്നു.
‘രാജാവിന്റെ മകനി’ലെ ആവേശമുണർത്തുന്ന ഈണങ്ങൾ മുതൽ ‘കിലുക്ക’ത്തിലെയും ‘പൈതൃക’ത്തിലെയും മെലഡികൾ വരെ ആ സംഗീതയാത്രയുടെ വൈവിധ്യം വിളിച്ചോതുന്നു. സിനിമയുടെ മൂഡ് തിരിച്ചറിഞ്ഞ് അദ്ദേഹം നൽകിയ പശ്ചാത്തല സംഗീതം ചിത്രങ്ങളുടെ വിജയത്തിൽ വലിയ പങ്കുവഹിച്ചു.
മലയാള സിനിമയിലെ ആക്ഷൻ-മാസ്സ് പടങ്ങൾക്കും പ്രണയചിത്രങ്ങൾക്കും ഒരുപോലെ ജീവൻ നൽകിയ ആ മാന്ത്രിക സ്പർശം ഇന്നും പ്രേക്ഷകമനസ്സുകളിൽ മായാതെ നിൽക്കുന്നു.നൂറിലധികം സൂപ്പർഹിറ്റ് സിനിമകൾക്ക് ഈണം നൽകിയ എസ്.പി. വെങ്കിടേഷ് തൊണ്ണൂറുകളിൽ മലയാള സിനിമയുടെ ശബ്ദമായി മാറി.
‘കിലുക്കം’, ‘മിന്നാരം’, ‘വാത്സല്യം’ തുടങ്ങിയ ചിത്രങ്ങളിലൂടെ അദ്ദേഹം മെലഡികളുടെ രാജാവായി മാറിയപ്പോൾ, ‘സ്ഫടികം’, ‘ധ്രുവം’, ‘ധ്രുവം’ തുടങ്ങിയ ആക്ഷൻ ചിത്രങ്ങളിലെ അദ്ദേഹത്തിന്റെ പശ്ചാത്തല സംഗീതം തിയേറ്ററുകളെ ആവേശത്തിലാഴ്ത്തി. ‘പൈതൃകം’ എന്ന ചിത്രത്തിലൂടെ സംസ്ഥാന പുരസ്കാരം നേടിയ അദ്ദേഹം, ജോണി വാക്കറിലെ പാശ്ചാത്യ ശൈലിയും സോപാനത്തിലെ ശാസ്ത്രീയ സംഗീതവും ഒരുപോലെ കൈകാര്യം ചെയ്തു.