മൂന്നര പതിറ്റാണ്ടിന്റെ കാത്തിരിപ്പിനൊടുവിൽ അർജന്റീന ലോകകിരീടത്തിലേക്ക് അടുക്കുകയായിരുന്നു. ലുസൈൽ സ്റ്റേഡിയത്തിലെ ഗാലറികൾ അർജന്റീനൻ ആരാധകരുടെ ആർപ്പുവിളികളാൽ പ്രകമ്പനം കൊണ്ടു. മെസ്സിയിലൂടെ മാറഡോണയുടെ പിൻഗാമികൾ കിരീടം തൊടുമെന്ന് ഉറപ്പിച്ച നിമിഷം. അതുവരെ അർജന്റീനൻ കോച്ച് ലയണൽ സ്കലോണി മെനഞ്ഞ തന്ത്രങ്ങൾക്കനുസരിച്ചായിരുന്നു ഫൈനലിന്റെ സഞ്ചാരം.
എന്നാൽ കളിയുടെ അവസാന പത്ത് മിനിറ്റിൽ ഫ്രഞ്ച് താരം കിലിയൻ എംബാപ്പെ കളം നിറഞ്ഞു കളിച്ചതോടെ ഫൈനലിന്റെ തിരക്കഥ മാറിമറിഞ്ഞു. മിനിറ്റുകളുടെ വ്യത്യാസത്തിൽ എംബാപ്പെ അർജന്റീനൻ വല കുലുക്കിയപ്പോൾ ആരാധകരുടെ നെഞ്ചിൽ തീ പടർന്നു.
മെസ്സിയുടെ കൈകളിൽ നിന്ന് ഒരിക്കൽക്കൂടി ലോകകിരീടം അകലുമോ എന്ന് ഭയപ്പെടുത്തിയ നിമിഷങ്ങളായിരുന്നു അത്. എംബാപ്പെയുടെ അവിശ്വസനീയമായ പോരാട്ടം അർജന്റീനയുടെ സ്വപ്നങ്ങൾക്ക് മേൽ കരിനിഴൽ വീഴ്ത്തിയെങ്കിലും, ചരിത്രപ്രസിദ്ധമായ ആ ഫൈനൽ പോരാട്ടം ഫുട്ബോൾ ലോകം ശ്വാസമടക്കിയാണ് കണ്ടുതീർത്തത്.