സുല്‍ത്താന്‍ ബത്തേരി: നിയന്ത്രണം നഷ്ടപ്പെട്ട് ഓട്ടോ മറിഞ്ഞുണ്ടായ അപകടത്തില്‍ രണ്ടുവയസുകാരിക്ക് ദാരുണാന്ത്യം. വയനാട് സുല്‍ത്താന്‍ ബത്തേരിയിലാണ് സംഭവം. നായ്ക്കട്ടി പിലാക്കാവ് ഊരാളി ഉന്നതിയിലെ രാജേഷ്-സുമ ദമ്പതികളുടെ മകള്‍ രാജലക്ഷ്മിയാണ് മരിച്ചത്.
തിങ്കളാഴ്ച രാവിലെ സുല്‍ത്താന്‍ ബത്തേരി കോട്ടക്കുന്നിലായിരുന്നു അപകടമുണ്ടായത്. രാജലക്ഷ്മി മാതാപിതാക്കള്‍ക്കും സഹോദരങ്ങള്‍ക്കും ഒപ്പം നായ്ക്കട്ടിയില്‍ നിന്ന് സുല്‍ത്താന്‍ ബത്തേരിയിലേക്ക് വരികയായിരുന്നു. യു ടേണ്‍ എടുക്കുന്നതിനിടെയാണ് ഓട്ടോ മറിഞ്ഞത്.
സംഭവസമയം മാതാപിതാക്കളുടെ മടിയിലിരിക്കുകയായിരുന്ന കുഞ്ഞ് ഓട്ടോയ്ക്കടിയില്‍പ്പെട്ടു. ഗുരുതരമായി പരിക്കേറ്റ കുഞ്ഞിന്റെ ജീവന്‍ രക്ഷിക്കാനായില്ല. അപകടത്തില്‍ മറ്റാര്‍ക്കും സാരമായ പരിക്കുകളില്ല.