ഡൽഹി ജന്തർ മന്തറിൽ സി.ജെ.പി. (Cockroach Janta Party) സമരത്തിനിടെ വിദ്യാർഥികൾക്ക് നേരെ നടന്ന പോലീസ് അതിക്രമത്തിനെതിരെ പാർലമെന്റിൽ പ്രതിഷേധം കടുപ്പിക്കാൻ ഇന്ത്യ സഖ്യം. വരാനിരിക്കുന്ന പാർലമെന്റ് സമ്മേളനത്തിന് മുന്നോടിയായി കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ ഓഫീസിൽ പ്രതിപക്ഷ നേതാക്കൾ യോഗം ചേർന്ന് പ്രതിഷേധ തന്ത്രങ്ങൾ ആസൂത്രണം ചെയ്യും. പെല്ലറ്റുകളടക്കമുള്ള ബലപ്രയോഗത്തിന് ഉത്തരവിട്ട ആഭ്യന്തരമന്ത്രി അമിത് ഷാ രാജി വെക്കണമെന്നും സംഭവം സഭയിൽ ചർച്ച ചെയ്യണമെന്നും പ്രതിപക്ഷ നേതാവ് രാഹുൽ ഗാന്ധി ആവശ്യപ്പെട്ടു.
ഇതിനിടെ പരീക്ഷാ ചോദ്യച്ചോർച്ച തടയുന്നതിനുള്ള ഭേദഗതി ബിൽ ലോക്സഭയിൽ അവതരിപ്പിക്കാൻ സർക്കാർ തയാറെടുക്കുകയാണ്. വിദ്യാർഥികളുടെ ചോദ്യച്ചോർച്ച വിരുദ്ധ പോരാട്ടങ്ങൾ ലക്ഷ്യം കണ്ടതായി ചൂണ്ടിക്കാണിച്ച കോൺഗ്രസ് നേതൃത്വം, വിദ്യാർഥികളെ ദ്രോഹിച്ചവർക്കെതിരെ കർശന നടപടി സ്വീകരിക്കണമെന്നും പ്രധാനമന്ത്രി നരേന്ദ്ര മോദി മാപ്പുപറയണമെന്നും ആവശ്യപ്പെട്ടു.