ദക്ഷിണാഫ്രിക്കയോടേറ്റ തോൽവിക്ക് പിന്നാലെ ഇന്ത്യൻ ബാറ്റിംഗ് നിരയിൽ മാറ്റത്തിന് ടീം മാനേജ്മെന്റ് ഒരുങ്ങുന്നു. തുടർച്ചയായി പരാജയപ്പെടുന്ന അഭിഷേക് ശർമയ്ക്ക് പകരം ചെന്നൈയിൽ സിംബാബ്വെക്കെതിരായ മത്സരത്തിൽ സഞ്ജു സാംസൺ പ്ലേയിംഗ് ഇലവനിലേക്ക് തിരിച്ചെത്തിയേക്കും. അസിസ്റ്റന്റ് കോച്ച് റയാൻ ടെൻ ഡോഷെറ്റാണ് ഇതുസംബന്ധിച്ച സൂചന നൽകിയത്.
അഹമ്മദാബാദിൽ ദക്ഷിണാഫ്രിക്കയ്ക്കെതിരെ നേരിട്ട കനത്ത തോൽവിയാണ് ഇന്ത്യൻ ബാറ്റിംഗ് നിരയിൽ മാറ്റത്തിന് കാരണമായത്. ടൂർണമെന്റിലുടനീളം ഓപ്പണിംഗ് ജോഡി പരാജയപ്പെടുന്നത് ടീമിനെ സമ്മർദ്ദത്തിലാക്കുന്നുവെന്ന് കോച്ച് റയാൻ ടെൻ ഡോഷെറ്റ് പറഞ്ഞു. അഭിഷേക് ശർമ തുടർച്ചയായി വിക്കറ്റ് നഷ്ടപ്പെടുത്തുന്നത് പരിഗണിച്ചാണ് സഞ്ജുവിനെ ഉൾപ്പെടുത്താൻ ആലോചിക്കുന്നത്.
സ്ഥിരതയാർന്ന ബാറ്റിംഗ് നിരയെ കണ്ടെത്താൻ ടീം മാനേജ്മെന്റ് ശ്രമിക്കുന്നതായി കോച്ച് ഡോഷെറ്റ് പറഞ്ഞു. മുൻപ് തിളങ്ങിയ പലരും ഇപ്പോൾ ഫോം കണ്ടെത്താൻ പ്രയാസപ്പെടുകയാണ്.
ഈ സാഹചര്യത്തിൽ സഞ്ജുവിനെ ടീമിൽ ഉൾപ്പെടുത്തുന്നത് ഗുണകരമാകുമെന്നും സഞ്ജുവിന്റെ സാന്നിധ്യം ടീമിന് കരുത്താകുമെന്നും അദ്ദേഹം വ്യക്തമാക്കി. സഞ്ജുവിനെ പ്ലേയിംഗ് ഇലവനിൽ ഉൾപ്പെടുത്തുന്നത് സംബന്ധിച്ച ചർച്ചകൾ വരും ദിവസങ്ങളിൽ നടക്കും.