ആഗോളതലത്തിൽ വിമാന ഇന്ധന (ATF) വില കുതിച്ചുയരുന്ന സാഹചര്യത്തിൽ അന്താരാഷ്ട്ര സർവീസുകൾക്ക് പിന്നാലെ ആഭ്യന്തര വിമാന സർവീസുകളിലും നിയന്ത്രണം പ്രഖ്യാപിച്ച് എയർ ഇന്ത്യ. ജൂൺ മുതൽ ഓഗസ്റ്റ് വരെയുള്ള മാസങ്ങളിൽ തങ്ങളുടെ ആഭ്യന്തര സർവീസുകളിൽ 15 മുതൽ 22 ശതമാനം വരെ കുറവ് വരുത്താനാണ് കമ്പനി തീരുമാനിച്ചിരിക്കുന്നത്.
പശ്ചിമേഷ്യൻ പ്രതിസന്ധികൾ കാരണം പ്രവർത്തനച്ചെലവ് ക്രമാതീതമായി ഉയർന്നതും, സ്കൂൾ അവധിക്കാലത്തിന് ശേഷം പൊതുവേ യാത്രക്കാരുടെ എണ്ണത്തിൽ ഉണ്ടാകുന്ന കുറവുമാണ് സർവീസുകൾ വെട്ടിച്ചുരുക്കാൻ കാരണമായി കമ്പനി ചൂണ്ടിക്കാണിക്കുന്നത്.
യാത്രക്കാർ ശ്രദ്ധിക്കുക: സർവീസ് നിയന്ത്രണങ്ങൾ ബാധിക്കുന്ന യാത്രക്കാർക്ക് മറ്റ് വിമാനങ്ങളിൽ പകരം യാത്രാസൗകര്യമോ, സൗജന്യമായി തീയതി മാറ്റാനുള്ള അവസരമോ എയർ ഇന്ത്യ നൽകും.
യാത്ര റദ്ദാക്കാൻ ആഗ്രഹിക്കുന്നവർക്ക് ടിക്കറ്റ് തുക പൂർണ്ണമായി റീഫണ്ട് ചെയ്യുമെന്നും കമ്പനി അറിയിച്ചിട്ടുണ്ട്. എയർ ഇന്ത്യയ്ക്കൊപ്പം ഇൻഡിഗോയും തങ്ങളുടെ സർവീസുകളിൽ 5% മുതൽ 7% വരെ കുറവ് വരുത്താൻ തീരുമാനിച്ചതോടെ വരും മാസങ്ങളിൽ ആഭ്യന്തര വിമാന ടിക്കറ്റ് നിരക്കുകൾ വീണ്ടും ഉയർന്നേക്കും.