ഡാലസ്: ഫിഫ ലോകകപ്പ് പ്രീക്വാർട്ടറിൽ സ്പെയിനോട് മറുപടിയില്ലാത്ത ഒരു ഗോളിന് തോറ്റ് പോർച്ചുഗൽ പുറത്തായതിന് പിന്നാലെ വികാരഭരിതനായി സൂപ്പർ താരം ക്രിസ്റ്റ്യാനോ റൊണാൾഡോ. കരിയറിലെ തന്റെ അവസാന ലോകകപ്പാണിതെന്ന് സ്ഥിരീകരിച്ച 41-കാരനായ താരം, ലോകകിരീടം നേടാനായില്ലെങ്കിലും പോർച്ചുഗലിനൊപ്പം നേടിയ യൂറോ കപ്പിന് ലോകകപ്പിന്റെ അത്രയും തന്നെ മൂല്യമുണ്ടെന്ന് വ്യക്തമാക്കി.
താൻ കഴിവിന്റെ പരമാവധി ചെയ്തെന്നും വ്യക്തമായ ധാരണയോടെയാണ് കരിയർ അവസാനിപ്പിക്കുന്നതെന്നും പറഞ്ഞ താരം, ഇനി കുടുംബത്തോടൊപ്പം സമയം ചെലവഴിക്കുമെന്നും കൂട്ടിച്ചേർത്തു. തനിക്ക് മുൻപ് പോർച്ചുഗലിന് ചരിത്രത്തിൽ ഒരു രാജ്യാന്തര ട്രോഫി പോലുമില്ലായിരുന്നുവെന്നും തന്റെ മികവിൽ ടീം 2016-ൽ യൂറോ കപ്പും, 2019, 2025 വർഷങ്ങളിൽ യുവേഫ നേഷൻസ് ലീഗും സ്വന്തമാക്കിയതായും റൊണാൾഡോ ഓർമ്മിപ്പിച്ചു. തോൽവിക്ക് പിന്നാലെ പോർച്ചുഗൽ പരിശീലകൻ റോബർട്ടോ മാർട്ടിനെസ് സ്ഥാനം രാജിവെക്കുന്നതായും പ്രഖ്യാപിച്ചിട്ടുണ്ട്.