2026 ഐപിഎല്ലിൽ മുംബൈ ഇന്ത്യൻസ് ടീമിനുള്ളിലെ ഭിന്നത പരസ്യമാകുന്നു. മത്സരത്തിനിടെ ഫീൽഡ് പ്ലേസ്മെന്റിനെച്ചൊല്ലി ക്യാപ്റ്റൻ ഹാർദിക് പാണ്ഡ്യയും ജസ്പ്രീത് ബുംറയും മൈതാനത്ത് തർക്കിച്ചത് വലിയ വിവാദമായിട്ടുണ്ട്. ടീമിലെ ഒത്തൊരുമ നഷ്ടപ്പെട്ടെന്ന സൂചന നൽകുന്ന ഈ സംഭവം ഇപ്പോൾ ക്രിക്കറ്റ് ലോകത്ത് ചർച്ചയാകുകയാണ്.
പഞ്ചാബ് കിങ്സിനെതിരായ മത്സരത്തിനിടെ ഫീൽഡ് ക്രമീകരണത്തെച്ചൊല്ലി ഹാർദിക്കും ബുംറയും തമ്മിൽ ഉടലെടുത്ത തർക്കം ക്യാമറയിൽ പതിഞ്ഞു. ഹാർദിക്കിന്റെ തീരുമാനങ്ങളോടുള്ള ബുംറയുടെ പരസ്യമായ വിയോജിപ്പും രോഷവും ടീമിനുള്ളിലെ അസ്വാരസ്യങ്ങൾ വ്യക്തമാക്കുന്നതായിരുന്നു.
ക്യാപ്റ്റന്റെ പെരുമാറ്റത്തിലുള്ള അതൃപ്തി ബുംറ മൈതാനത്ത് പ്രകടിപ്പിച്ചത് വലിയ ചർച്ചയായിട്ടുണ്ട്.ബുംറയെപ്പോലുള്ള താരങ്ങളെ ഹാർദിക് പാണ്ഡ്യ ശരിയായി വിനിയോഗിക്കുന്നില്ലെന്ന ആരാധകരുടെ പരാതികൾക്കിടയിലാണ് ടീമിലെ ഭിന്നത പുറത്തുവന്നത്.
ബുംറയെ ഫീൽഡ് മാറ്റാൻ പോലും അനുവദിക്കാത്തതിൽ രോഹിത് ശർമയും അതൃപ്തി പ്രകടിപ്പിക്കുന്ന ദൃശ്യങ്ങൾ പുറത്തുവന്നതോടെ മുംബൈ ക്യാമ്പിലെ അസ്വാരസ്യങ്ങൾ കൂടുതൽ വ്യക്തമായി.വിവാദങ്ങൾക്കിടെ നടന്ന മത്സരത്തിൽ പഞ്ചാബ് കിങ്സിനോട് മുംബൈ ഇന്ത്യൻസ് ഏഴ് വിക്കറ്റിന് പരാജയപ്പെട്ടു.
മുംബൈ ഉയർത്തിയ 196 റൺസ് വിജയലക്ഷ്യം 21 പന്തുകൾ ബാക്കിനിൽക്കെ പഞ്ചാബ് മറികടന്നു. ഈ സീസണിൽ കളിച്ച അഞ്ച് മത്സരങ്ങളിൽ നാലിലും തോറ്റ മുംബൈ അതീവ പ്രതിസന്ധിയിലാണ്.