തുടർച്ചയായ പരിക്കുകളും ഫോമില്ലായ്മയും വേട്ടയാടുമ്പോഴും, ലോകം കാത്തിരുന്ന ആ പ്രഖ്യാപനമെത്തി—നെയ്മർ ജൂനിയർ ലോകകപ്പിനുള്ള ബ്രസീൽ ടീമിലുണ്ട്! യുവതാരങ്ങളുടെ കരുത്തിൽ ലോകം കീഴടക്കാൻ ഒരുങ്ങുന്ന വിശ്വവേദിയിൽ നെയ്മറിന് എത്രത്തോളം തിളങ്ങാനാകുമെന്ന ചോദ്യങ്ങൾ ഉയരുന്നുണ്ടെങ്കിലും, ആരാധകർക്ക് ആ ഒരൊറ്റ പേര് മാത്രം മതിയായിരുന്നു.
കാർലോ അൻസലോട്ടി പ്രഖ്യാപിച്ച ലോകകപ്പ് സ്ക്വാഡിൽ ലൂയിസ് ഹെൻറിക്കും മാത്യൂസ് കുന്യക്കും പിന്നാലെ നെയ്മറിന്റെ പേര് വന്നതോടെ ആവേശം അണപൊട്ടി ഒഴുകുകയാണ്. തന്റെ തന്ത്രങ്ങളിൽ നെയ്മറില്ലാതെ അമേരിക്കയിലേക്ക് വണ്ടികയറില്ലെന്ന് ഉറപ്പിച്ച അൻസലോട്ടിയുടെ കാനറിപ്പട, ഇനി കിരീടത്തിൽ കുറഞ്ഞതൊന്നും ലക്ഷ്യം വെക്കുന്നില്ല.
സാവോപോളോ മുതൽ റിയോ ഡി ജനീറോ വരെ ഇപ്പോൾ ഒരൊറ്റ മന്ത്രമേയുള്ളൂ—നെയ്മറുമായി ബ്രസീൽ വരികയാണ്, ആറാം ലോകകിരീടം തേടി!