നടി തൃഷയ്ക്കെതിരെ അധിക്ഷേപകരമായ പരാമർശം നടത്തിയെന്ന പരാതിയിൽ തമിഴ്നാട് പ്രതിപക്ഷ നേതാവും ഡി.എം.കെ നേതാവുമായ ഉദയനിധി സ്റ്റാലിനെ പൊലീസ് കസ്റ്റഡിയിലെടുത്തു. തമിഴക വെട്രി കഴകം (ടി.വി.കെ) വനിതാ വിഭാഗം നൽകിയ പരാതിയുടെ അടിസ്ഥാനത്തിൽ ചെന്നൈയിലെ വസതിയിൽ നിന്നാണ് തഞ്ചാവൂർ പോലീസ് അദ്ദേഹത്തെ കസ്റ്റഡിയിലെടുത്തത്.
കാവേരി നദീജല തർക്കവുമായി ബന്ധപ്പെട്ട് തഞ്ചാവൂരിൽ നടത്തിയ പ്രസംഗത്തിൽ മുഖ്യമന്ത്രി വിജയ്ക്കെതിരെ സംസാരിക്കവെ, ആൾക്കൂട്ടത്തിൽ നിന്ന് ഉയർന്ന അനാവശ്യ വിളികൾക്ക് മറുപടിയായി ഉദയനിധി നടത്തിയ ദ്വയാർത്ഥ പ്രയോഗമാണ് വിവാദമായത്.
അറസ്റ്റ് ഭയന്ന് ഉദയനിധി സ്റ്റാലിൻ സമർപ്പിച്ച മുൻകൂർ ജാമ്യാപേക്ഷ മദ്രാസ് ഹൈക്കോടതി പരിഗണിക്കാനിരിക്കെയാണ് ഈ നാടകീയ നീക്കം നടന്നത്. പരസ്യമായി നടത്തിയ പരാമർശങ്ങൾ നിഷേധിച്ചുകൊണ്ട് ഉദയനിധി പിന്നീട് രംഗത്തെത്തിയെങ്കിലും, അദ്ദേഹം കപടത കാണിക്കുകയാണെന്ന് ടി.വി.കെ ഉൾപ്പെടെയുള്ള ഭരണപക്ഷ പാർട്ടികളും ബി.ജെ.പിയും ആരോപിച്ചു. സംഭവം തമിഴ്നാട് രാഷ്ട്രീയത്തിൽ വലിയ വിവാദങ്ങൾക്കാണ് വഴിവെച്ചിരിക്കുന്നത്.