സുരേഷ് ഗോപിയുടെ ഒരു സിനിമ വരുന്നു. ഈ തലക്കെട്ട് കണ്ടാൽ തന്നെ സിനിമാ പ്രേക്ഷകർക്കൊരു ആവേശമാണ്. മാസ് ഡയലോഗും സ്ക്രീൻ പ്രെസൻസുമെല്ലാം കൊണ്ട് സുരേഷ് ഗോപി അങ്ങനെ ബിഗ് സ്ക്രീനിൽ നിറഞ്ഞു നിൽക്കും.
അതു കാണാൻ തന്നെ സിനിമാ പ്രേമികൾക്ക് നല്ലൊരു ചേലാണ്. അത്തരത്തിലൊരു സിനിമയ്ക്കായി കഴിഞ്ഞ കുറച്ചു നാളായി പ്രേക്ഷകർ ഒന്നടങ്കം കാത്തിരിക്കുകയാണ്.മറ്റൊന്നുമല്ല ഒറ്റക്കൊമ്പൻ ആണ് ആ ചിത്രം. കടുവാക്കുന്നേല്‍ കുറുവച്ചന്‍ എന്ന റിയൽ ലൈഫ് കഥാപാത്രമായി സുരേഷ് ഗോപി എത്തുന്ന ചിത്രത്തിന്റെ ഷൂട്ടിംഗ് പുരോഗമിക്കുകയാണ്.
ഈ അവസരത്തിൽ ഒറ്റക്കൊമ്പന്റെ ഷൂട്ടിങ്ങുമായി ബന്ധപ്പെട്ട വിവരം പങ്കുവച്ചിരിക്കുകയാണ് സുരേഷ് ഗോപി. പാലയിലാണ് നിലവിൽ ഷൂട്ടിംഗ് പുരോഗമിക്കുന്നത്. ഇവിടെ വച്ചൊരു മാസ് ഫൈറ്റുണ്ടാകുമെന്നാണ് താരത്തിന്റെ പോസ്റ്റിൽ നിന്നും വ്യക്തമാകുന്നത്.
കഴിഞ്ഞ ദിവസം രാത്രി 10 മണി മുതൽ പിറ്റേദിവസം അഞ്ച് മണി വരെ, 1500ലധികം കലാകാരന്മാരുമായിട്ടായിരുന്നു ഷൂട്ടിംഗ് പുരോഗമിച്ചതെന്ന് സുരേഷ് ഗോപി പറയുന്നുണ്ട്. ഇതിഹാസ കഥയെന്നാണ് ഒറ്റക്കൊമ്പനെ സുരേഷ് ഗോപി വിശേഷിപ്പിച്ചത്.