കൊച്ചി മെട്രോയുടെ പേര് മാറ്റുമെന്ന വാർത്തകൾ നിഷേധിച്ച് മുഖ്യമന്ത്രി വി. ഡി. സതീശൻ രംഗത്തെത്തി. കൊച്ചി മെട്രോയുടെ പേര് ‘കേരളം മെട്രോ’ റെയിൽ ലിമിറ്റഡ് എന്ന് പുനർനാമകരണം ചെയ്യുന്നതിനായി കെ.എം.ആർ.എൽ. എം.ഡി. ലോക്നാഥ് ബെഹ്റ സർക്കാരിന് ശുപാർശ നൽകിയെന്ന റിപ്പോർട്ടുകളോട് പ്രതികരിക്കവെയാണ്, അങ്ങനെ ഒരു ചർച്ചയും സർക്കാരിന്റെ പരിഗണനയിൽ ഇല്ലെന്നും പേരുമാറ്റത്തെക്കുറിച്ച് സർക്കാർ ഒന്നും അറിഞ്ഞിട്ടില്ലെന്നും അദ്ദേഹം വ്യക്തമാക്കിയത്.
രാവിലെ പത്രവാർത്തകൾ കണ്ടാണ് താൻ പോലും ഈ വിവരം അറിഞ്ഞതെന്നും, അങ്ങനെ ഒരു പ്രഖ്യാപനം വന്നിട്ടുണ്ടെങ്കിൽ അത് കെ.എം.ആർ.എല്ലിന്റെ ഏകപക്ഷീയമായ നിലപാടാണെന്നും അദ്ദേഹം പറഞ്ഞു.
സംസ്ഥാനത്തൊട്ടാകെയുള്ള നഗര ഗതാഗത പദ്ധതികൾ, തിരുവനന്തപുരം-കോഴിക്കോട് മെട്രോകൾ, വാട്ടർ മെട്രോ എന്നിവയുടെ ഏകോപനം ലക്ഷ്യമിട്ട് അഹമ്മദാബാദ്, നാഗ്പൂർ മാതൃക പിന്തുടർന്നാണ് പേരുമാറ്റത്തിന് കെ.എം.ആർ.എൽ ശുപാർശ സമർപ്പിച്ചതെന്നും, ഇതിനായി കമ്പനിയുടെ ബജറ്റിൽ നിന്നാണ് തുക വകയിരുത്തുകയെന്നും ലോക്നാഥ് ബെഹ്റ അറിയിച്ചിരുന്നെങ്കിലും, സർക്കാരിന്റെ പ്രാഥമിക അനുമതിയില്ലാതെ ഇത്തരം ഒരു നീക്കവുമായി മുന്നോട്ട് പോകാനാകില്ലെന്നാണ് മുഖ്യമന്ത്രി നിലപാട് വ്യക്തമാക്കിയത്